Mecelle-i Umur-ı Belediyye'nin cild-i sanisi Emanet'e ait bilcümle kavanin, nizamat ve talimata hasr ve tahsis edilmiştir. İşbu kavanin ve nizamat-ı müdevvere meyanında el-yevm hükmü mer'i olmayanlar bulunduğu gibi taşra belediyelerine mahsus olanlarla Tedarik-i Vesait-i Nakliyye-i Askeriyye Kanunu gibi dolayısıyla belediyeye taalluku bulunanlar da vardır. Kavanin ve nizamat-ı mefsühanın dercedilmemesini ihtar edenler olmuş ise de yeni Düstur'un cild-i evveli mukaddimesinde de beyan olunduğu üzere muhaffif-i ceza olan ahkâm-ı kanuniyyeden ma'ada kavanin ve nizamat ma-kabline şamil olmayıp her hadisenin zaman-ı vukuunda mer'i olan kavanin ve nizamata tevfikan hall ü tesviyesi bir kaide-i esasiyye olması hasebiyle mehakim ve devair yalnız kavanin ve nizamat-ı hazırayı tatbik ile mükellef olmayarak senelerce evvel vuku bulmuş ukud ve muamelattan dolayı bunların tarih-i akd ü icrasında düsturü'l-amel olan kavanin ve nizamata da bina-yı hükm ü muameleye mecbur bulunduklarından ve mesela 1296 tarihli İstimlak Kararnamesi'nin hükmü 1329'da neşrolunan İstimlak Kanun-ı Muvakkati'yle fesholunmuş ise de kararnamenin mer'i bulunduğu zamanlarda hadis olan bir davanın hin-i ru'yetinde veya o tarihlere ait bir işin esna-yı tedkikinde mezkûr kararnameye müracaat tabii olduğundan bu mecbüriyet dahi kavanin ve nizamat-ı mefsühanın el-yevm mer'i olanlar miyanında Mecelle'ye dercini icab ettiren esbab-ı mühimme cümlesindendir. Bir de kavanin ve nizamat-ı mer'iyye ile münfesihanın tayin ve tefriki maddesi feshin sarahaten veya sarahatin fıkdanı halinde kavanin-i cedide ahkâmının kavanin-i atıka ahkâmıyla adem-i itilafına mebni zımnen vuku'u ihtimalatına göre tebeddül edip şıkk-ı sani bazan mesail-i tefsiriyye füruatından ve binaenaleyh halli Kanun-ı Esasi'nin 117nci maddesi mucebince ale'd-derecat Heyet-i A'yan ile Mahkeme-i Temyiz ve Şura-yı Devlet'in daire-i salahiyyetlerine dahil bulunduğundan kavanin ve nizamat-ı münfesihanın mer'iyyü'l-icra olanlardan tefrikiyle adem-i derci bu sebeple de caiz görülememiştir...

---